Joh 16 | MMX | STEP | Agara tong axasep pam nimi mi na levempanga xusu mi noxo subu kot kantubu.

John 16

1 Agara tong axasep pam nimi mi na levempanga xusu mi noxo subu kot kantubu. 2 Luvuttadi amgomgo dinaba sep pepe nimi xusu mi noxo vubeles bok ba uto at laraugu singising. La laaleng move naba vot, la do tara na sev amet tara atnimi, ni naba nua i do i lox i mo ri lox amomo ne Moroa. 3 Dinaba lok na levempanga rinimi mila nedi xa xopmen dinaklen nema mi ne Tamak. 4 La a tong pam i na rinimi, do levenaleng na vot kusu dina lok na levempanga, miba doxoma bilong ti na levelinga rak.”

Lugugu At Loroonan Kaala

La ne Iesu ga lok bok tidi xeretna, “Agoxo vaase i na levempanga at lavakpaxaru kaxat at levenanasa rak tinimi, mila aga nemen eburu minimi. 5 Ketla mo nga anat pas uto ap mo lara, neni ga riki ia ude, ketla kopmen tara dom kantubu atnimi gita sue ia do, unat pas ua? 6 La mo nga nia a tong na levempanga rinimi, kuren la lainbulu mo ira umsu nga at lorooro atnimi. 7 Ketla a tong tuturun i rinimi. I lox avukat do nenia ana on basinge nimi. Do nenia a noxo onon, laradi loklok tooro noxo vot pasa nimi. Ketla do ana onon, nenia aba riki aonon i ude saparap nimi. 8 La do neni na vot, neni naba lox ase limixin at na lavatbung menemen do nedi di umsu mi laxakapmek la kopmen tomokmokso na nemen keneng atdi, la at laaleng ete, ne Moroa naba ronga linga at limixin axap. 9 Neni naba lox ase di do di bixurun mi laxakapmek, mila kopmen dina nuunu rak. 10 Neni naba lox ase di mi loklok mokmokso, mila nenia anabat pas uto at ne Tamak la minoxo ven bok ba ia. 11 Neni naba lox ase di do laaleng ete at ne Moroa naba vot, mila laradi gomgo at na lavatbung menemen, ne Moroa ira lok li vam i at lavapaase la ira li lumumuat mavana ren.

12 A ruuna bok laxalinga solo xusu ana vaase nimi min, ketla naba lolos aleng tinimi xusu mina doxoma xaka i. 13 Ketla Loroonan Kaala naba vot, ni naba paase asu luruturun at levelinga at ne Moroa, la ni naba anasa nga nimi mi mo levelinga axap i ruturun. Ni noxo anasa nimi mi lodoxoma axa ren, ketla neni naba paase asu levempanga neni ba ronga i boro at ne Moroa la neni naba paase nimi mi levempanga move naba vot. 14 Neni naba lox asilok laasen tarak mi lugugu ren, mila neni naba lok kaka levelinga rak la na anasa nimi min. 15 Levempanga ne Tamak i ruuna i, mo axav i atarak; kuren la a lok do Loroonan Kaala naba lok ka levelinga rak la ni na anasa nimi min.”

Lainbulu La Lomomo

16 La ne Iesu ga lok bok, “Noxo lox abao la mi noxo ven ia la noxo lox abao la miba ven bok ba ia.”

17 Leventaba atdi luvuttadi loklok ka anasa ren diga esue min kantubu atdi xeretna, “Ua lavasuun at na levelinga neni i tong i ridik? I lok do, ‘Noxo lox abao la mi noxo ven ia, la noxo lox abao bok la miba ven ia.’ La i lok bok do, ‘Mila nenia anat pas uto at ne Tamak.” 18 La diga esue manga, “Ua lavasuun at na levelinga, ‘Noxo lox abao?’ Dik dixo xasep ap mo levelinga ren.”

19 Iesu gaklen pam i do luvuttadi loklok ka anasa ren diga vara i do dina sue i mumu i na, kuren la neni ga lok tidi, “A tong i do, noxo lox abao la mi noxo ven ia, la noxo lox abao bok la miba ven bok ba ia. La mi esue mi na xantubu atnimi, do? 20 A tong tuturun i rinimi do, mibang teng la mina saxaanu. Ketla limixin at na lavatbung menemen diba momo; miba bulu, ketla lainbulu atnimi naba rem gili ri lomomo. 21 Se do latkin i suma madak, neni i bulu, mila loxonaleng tin ti songot, ia vot pam; ketla do neni ira ranga madak, neni xopmen na doxoma bok ba losongsongot teren, mila neni i momo mi lumumulum ira visik pam i. 22 I lok kuren mun tinimi; monga nemi mi bulu, ketla aba ven bok ba nimi la minaba umsu mi lomomo, la kopmen tara naba lok pes mo lomomo basinge nimi. 23 Do mo laaleng na vot, nemi noxo sue bok ba ia ri tavanga. A tong tuturun i rinimi, ne Tamak naba raba nimi mi levempanga salai nemi miba sing tin keneng at laasen tarak. 24 Ga ru ka i gano la ia se nga mo, mi goxo sing ti tevempanga xeneng at laasen tarak. Mina ngising ti tevempanga la miba ruuna ka i, kusu lomomo atnimi naba umsu.”

Iesu Ira Lox Asi Vam Laxakapmek At Na Lavatbung Menemen

25 Aga vaase na levelinga rinimi mi lempapaase poovo. Ketla laaleng move naba vot la nenia xopmen anoxo tong asu bok ba lempapaase poovo, ketla aba paase kasep tinimi mumu ne Tamak la miba xasep nunuan teren. 26 Do mo laaleng na vot, miba sing ne Moroa xeneng at laasen tarak; la axo tong i do nenia aba sing kusu ne Moroa naba lok tooro nimi. 27 Nemi xa mina sing ne Tamak mila ne Tamak axa i balamu aleng nimi. I balamu nemi mila nemi mi balamu ia la mira nuunu do nenia aga vas kaxat boro at ne Moroa. 28 Agat pas boro at ne Tamak la aga vot nade at na lavatbung menemen; la mo nga ana on basinge na lavatbung menemen la anamlong manga uto at ne Tamak.”

29 La luvuttadi loklok ka anasa ren diga lok tin, “I lox avukat, nenu mo u paase asaxaven ba, la kopmen bok ba una paase poovo. 30 Monga maklen ba i do nenu uklen levempanga axap; ixo epovo do tara naba sue u mi tevesusue. Anai i lok nema la ma nuunu do nenu uga laa boro at ne Moroa.”

31 La ne Iesu ga lok tidi xeretna, “Mi nuunu ba mo, do? 32 Laaleng move naba vot, la na nga ia nemen pam, la miba epeseves basinge ia, la nenia xusuk abak lok. Ketla kopmen nenia xusuk, ne Tamak naba nemen eburu minia.

33 Agara tong pam i na rinimi xusu miba ruuna ka limila. Nemi minaba suma losongsongot boro at limixin at na lavatbung menemen. Ketla mina tu tuxuruxun. Ara los kimit pam laxakapmek at na lavatbung menemen.”